alah hari kaduo puaso naiak, iyo taraso ba parubahan. Surau satu-satu nyo nan ado dikampuang Kaciak tu, sabana langang. Puaso nan lapeh lai banyak nan sumbayang mugarik disinan, bamuloi jo babuko basamo-samo bagai. Mandeh-mandeh dikampuang tu, baganti-ganti mambuek pabukoan untuak Labai Murauk nan manjadi garin surau. Untuak mangawaninyo, baganti-ganti pulo murik mangaji nyo babuko disinan tu. Sudah tu basambuang pulo jo Tarawiah-Tadaruih sampai parak siang jo urang-urang sakampuang.

    Nan puaso sakali nangko, surau tu iyo sabana kalam....... Indak ado lai nan mangguguah tabuah jo abang Mugarik bagai. Dari jauah alah cando surau tingga bana. Sabana kalam indak balampu........ Baitulah, sajak Labai Murauk alah maninggako sabulan sabalun ka masuak bulan puaso nangko.

    Biasonyo satiok pulang bulan puaso, Malin Mudo indak tingga pai ka surau tu untuak batarawiah. Kadang-kadang bia indak bara urang bana nan tibo doh, tapi lai taruih ado nan batarawiah. Sakurang-kurangnyo Labai Murauk jo murik-muriknyo agak batigo, sarato urang gaek-gaek, lai tu disinan. 

    Sasudah babuko dirumah rang gaeknyo sanjo tadi, Malin Mudo nampak tagak tapana dimuko surau tingga tu. Nampak cando tagijau, awanyo. Ilalang dilaman surau nampak alah tinggi-tinggi. Kok sarok alah sambuah pulo bateba.....Katiko naiak ka langkan, nampak pulo cik kambiang taserak dima-dima............ Disingkok kannyo pintu surau tu, ...............iyo tapacak aie mato Malin Mudo.........Sabana kalam pitok. Pado hal sajak ketek jaleh bana dek  inyo, baraso satiok puaso urang barami-rami tarawiah disurau nantun.

    Dicatuihkannyo api-api sabatang...... lai nampak dinyo tigo guluang lapiak pandan nan biaso dipakai sumbayang bajama’ah, tasanda ka dindiang. Di sabalah suok, lai ado pulo nampak tagantuang lampu dindiang nan simporongnyo alah tingga sakuduang lai. Dipanggang nyo lah sumbu lampu tu dek Malin Mudo, tapi indak namuah iduik, karano minyaknyo alah kariang......

    Bagageh Malin Mudo kalua baliak. Dipakancang nyo langkah nyo nak capek tibo dirumah. Diambiaknyo minyak tanah saboto didapue rang gaek nyo. Sudahtu awanyo nak babaliak kasurau baliak
-    Ka kama pulo waang ko lai Malin? ........Kan alah malam ko ari?
Mandeh Malin Mudo manyapo, mancaliak anak bujang nyo tagageh-gageh dari dapue mambao boto minyak tanah.
-    Nak tarawiah, mak.... kasurau.....
-    Kasurau dima? ........Kan indak bapakai surau awak tu lai....
-    Iyo dek itu lah.... dek indak ado nan kamamakai, bia nak awak nan mamakai nyo.

Mandeh Malin Mudo nampak pucek. Dipagantuanginyo langan baju anak bujang nyo tu.
-    Kumbali liak lah Yuuuaaanggg, ..... jan pai ke’en lai.... ‘kan lai jaleh dek ang baraso....
-    Iyo, iyo.... lai jaleh di ambo mak..... baraso urang dikampuangko takuik kasurau karano Labai Murauk manjadi hantu....... kan baitu mukasuik Amak?

Malin Mudo galak manih nak ma umbuak ati amaknyo tu. Nan amak nyo tu tasisuruik salangkah. Nampak ragu, baliau tu ma angguak-angguak jo muko nan pucek pasi. Aie mato nyo baganang kacameh an. Nan Malin Mudo indak manjawek bagai lai, ditingga kannyo samiang amaknyo nan katakuik an tu. Kok dipaturuikkan, jaleh indak ka buliah dek baliau, Malin Mudo ko pai doh.

Malin Mudo bajalan pulo capek-capek baliak ka surau nantun. Diiduikkannyo lampu dindiang tu baliak sasudah diisinyo jo minyak tanah nan dibaonyo dari rumah cako....... Lai agak tarang lareh nampak dalam surau tu kini.

    Agak tagak juo bulu ramang Malin Mudo katiko mambantangkan lapiak untuak sumbayang sunaik duo raka’aik. baa kaindak.....? Disiko bulan nan lapeh Labai Murauk babujue jo basumbayangkan.......Babarapo ari sasudah tu, pacah kaba baraso ado urang nan manampak Labai Murauk acok sumbayang surang disiko......... Hhhhiiiiii.......

-    Bialah.... kok iyo jadi hantu nyo,...... kok tibo wanyo.......... nak den bao jo baiyo.......
Kecek Malin Mudo dalam hati, sambie takabie mamulai sumbayang sunaiknyo. Sudahtu ditaruihkannyo jo sumbayang Isya. Sasudah Isya taruih pulo inyo Tarawiah sampai duo puluah tigo raka’aik....... Lai indak baa-baa.......indak ado apo-apo, doh.

    Sadang mambaco doa jo ba dikie,...... tadanga ado nan manggaresoh-pesoh dipintu surau........ Iyo agak badatak juo hati Malin Mudo...... Sambie mambaco ayat Kursyi, malangkah lah inyo lambek-lambek, kapintu nan  tasaok tu........ Katiko pintu disimbahkannyo........ nampak urang lai batigo, lari lintang pukang, sirumbuih tumbuih....... Ado nan mambaok senter,...... tacampak senter tu ditangah labuah.

-    Sia tuuuuu......!!!!!!!!!
Sorak Malin Mudo kareh-kareh...... Haniang..... indak ado nan manjawek. Tapi di langkan..... ado tabayang cando barang nan taguliang...... Didakek i nyo dek Malin Mudo....... Kironyo iyo ado surang urang tatilantang......... pansan......... Katiko disiginyo jo lampu nan simporongnyo tingga sakuduang tu, jaleh baraso urang tu kironyo...... si Kutar..... bujang kaciak, murik mangaji Labai Murauk....... Jadi lai indak hantu bagai doh, kironyo.

    Sasudah ditapuak-tapuaknyo pipih si Kutar tu dek Malin Mudo, lai jago awanyo nampak...... Lai capek inyo tau diurang babaliak............
-    Ampuuuun...... ampun ambooooo...... angku Labbbaiiiii........
Si Kutar basujuik-sujuik dimuko Malin Mudo...Patah lidah nyo.....suaronyo manggigie... 
-    Manga waang........?
-    Ampun ambo angku Labai...... ampuuuun..... jan di panga-panga kan ambooooooo....
Nan si Kutar ko mintak-mintak ampun juo taruih, sambie manyabuik “Angku Labai.... ...........Angku Labai” sambie manangih...........Sarawanyo lah muloi basah nampak.......

-    Hoih.... Kutar...... caliak elok-elok........ sia den di ang.......? Lai tantu awaden di ang?
Si Kutar tapana-pana juo baru. Diparatikannyo Malin Mudo tanek-tanek......
-    Angkuuu........Labbbbai......Murrrrauuuk......?
Jaweknyo lambek-lambek, manggigie, bacampue pulo jo ragu-ragu.
-    Cimpurin!!!......... Astagfirullaaaah....... caliak elok-elok sia den di ang.....

Digisa nyo mato nyo tigo kali dek si Kutar, sambie katakuik an juo.........
-    Angku.....Ma...liiin........ Muddd....doooo...... mah kiro....nyoooo????
-    Iyo awaden ko....... baa mangko takuik bana waang di den?

Si Kutar tagagik-gagik. Tapi lai nampak alah bamulo agak timbue sumangaiknyo sangenek. Di onyokkannyo tangannyo nak basalam jo Malin Mudo, nan dijawek pulo dek Malin Mudo.
-    Jo sia waang kamari?
-    Lai jo....jo kawan-kawan......
-    Maaa nyo kawan-kawan ang tu?
-    .............abih lari.... takuikkkk...... Kami tadi manyangko....... maniangko......angku Labai...........

Dibae nyo galak gadang lai dek Malin Mudo.
-    Pai imbau kawan-kawan ang tu baliak, pilah....... Kok ado urang kampuang bagai nan basirobok di ang, ajak sakali kamari......Kecekkan awaden Malin Mudo, nan kini di surau ko......joh.
Si Kutar ma angguak-angguak, sudah tu inyo malucuih pai dari sinan. Tingga lah Malin Mudo tasengeang-sengeang, bapikie surang. Ibo atinyo lai pulo,..... mancaliak urang kampuangnyo tu bi takuik jo curito hantu Labai Murauk........ Antah sia pulo kolah nan mamuloi curito nan bak nantun?, pikienyo. Dipanggangnyo paisok sabatang, sambie basanda di langkan surau tu.

    alun abih rokoknyo tu lai, dari jauah alah nampak lampu senter ma ijok-ijok, ado suluah bagai. Nampak babarapo urang tibo makin lamo samakin dakek ka surau nantun.
-    Assalaaamu’alaikum.........
-    Wa’alaikum salaaam warahmatullaaah......
Malin Mudo manjawek salam. Si Kutar kironyo paliang dimuko, langsuang basalam jo Malin Mudo. Diiriangkan pulo anyo lai dek nan lain-lain.

-    Maaf kami angku Malin....... lah sasek kami......
-    Sasek baa....?
-    Iyo tadi katiko kami manampak lampu iduik dalam surau..... kami intai..... nampak ado urang nan sadang sumbayang.......Kami sangko.....kami sangko ......maniangko.... 
-    Maniangko kan lah mandaulu......baa lo inyo ka sumbayang disiko? Tampaik inyo sumbayang, mungkin........antah alah diateh ‘Arasy nan tinggi....... Indak tau bagai awak lai tu....

Urang-urang nan bitibo tu bi haniang... nampak takuncun-kuncun juo baru, kasadonyo.
-    Kini baitu lah......... Ko dikampuang awak ko alah babuek surau, tapi indak bapakai. Bakecekkan disurau ko ado antu Labai Murauk....... Indak badoso awak tu?..... Sabana gadang doso kito tu mah......... Guru mangaji awak bakecekkan jadi antu..... sudah tu batingga kan pulo surau sarancak nangko............
-    Iyo...... dek ado nan manampak ko ‘ngku....... adoh panampak an.......
-    Aaaaa nan nampak? Dijaman kini indak ado bagai nan picayo jo antu paburu bagai lai..... Ubilih maa pulo nan ka talok mandakek ka surau?,.....kalau surau tu dipakai untuak ba ibadaik? Antah kok alah musiriak-munapiak kito ko kasado alah nyo ko kini......?
Urang bi manakue pakau mandangakan.
 
Sudah tu tibo pulo pulo sarombongan lai urang agak banyak. Ado induak-induak  bagai,.....Ado nan mambao lampu sitarongkeang bagai, sahinggo surau tingga tu manjadi rami....... tarang bandarang dek sitarongkeang tu. Kironyo dirombongan tu ado pulo ‘nyiak Wali Nagari bagai......iyo sabana capek kaba rupo nyo sampai kasagalo isi kampuang kaciak tu, sahinggo garondoh pondoh tibo disurau, malam tu juo.
 
-    Untuang lai nan barani cando Malin Mudo....... Sado nyo urang bi takuik kasurau, mandanga curito nan indak-indak......Ambo alah agak ilang aka pulo jo curito tu........
Kecek ‘nyiak wali babisiak ka Malin Mudo. Sudah tu ‘nyiak wali bakatubah panjang lai dimuko urang banyak, nan tadi katakuik an.

-    Jadi,‘kan alah jaleh tu.....indak ado bagai tu doh curito-curito bantuak nan salamo ko.
-    Iiiiyyyyoooooo......
Sarantak urang bi manjawab,.........takzim.
-    Barisuak pagi kito basamo-samo kontoroyong mambarasiahkan surau ko....dih?...
-    Jaaaaddddiiiihhhh.......
Sarantak pulo urang bi manjawek.
-    Barisuak sanjo, basamo-samo kito babuko disurau ko..... Bao pabukoan dari rumah surang-surang........dih?.
-    Jaaaaddddiiiihhhh.......
-    Sudah tu ba Tarawiah kito basamo-samo pulo, dih?.
-    Jaaaaddddiiiihhhh.......
-    Nan kini bi pulang lah dulu........Barisuak kito ka bakarajo kareh...........

Indak ado nan manggarik surang alah juo doh.......... Tacangang pulo ‘nyiak wali.
-    Aaaa lai....?
-    Indak baitu doh ‘nyiak wali..... kini sen lah awak muloi, basamo-samo mangamehi surau ko, baa nyoh?.......Nak rami takah nan taralah babaliak.......
-    Iyotu............Kini sen lah....Kini sen lah....Muah kito......muah kito.... muah .... muah....muah..........

Kasado alah urang-urang tu sarantak tagak mamuloi bakarajo mangulenseangkan langan baju surang-surang. Ado nan pulang manjapuik sapu. Ado pulo nan mambao embe untuak aie pambasuah lantai surau tu bagai......
-    japuik sitarongkeang duo buah lai karumah den........
Nyiak wali tambah basumangaik pulo........ Sampai parak siang urang sa kampuang tu bagotong royong bakarajo kareh,...........nan basudahi jo makan sahur basamo-samo.

    Sajak hari tu lah surau alah rami babaliak. Alah tadanga babaliak tabuah jo azan Mugarik. Alah banyak nan Tarawiah, batadaruih bagai. Murik-murik Labai Murauk baganti-ganti manjadi garin.......
-    Sabana bajaso ko Malin...... Allah Ta’ala sajo nan kamambaleh jaso Malin ko nyoh. 

Nyiak wali basalam arek jo Malin Mudo. Sabana bangga baliau jo anak mudo bantuak Malin ko......Tapi.....tigo ari sasudah tu, Malin Mudo tapaso pai maninggakan kampuang nyo tu baliak, karano inyo kini sadang kuliah di IAIN..............Bi rusuah pulo urang sakampuang nak malapeh nyo............ Untuuuuang lai Malin Mudo....... kecek urang sabalik.

-    Hari Rayo nantik,....... kami nantikan Malin basumbayang Idulfitri disiko handaknyo.......... kami mintak Malin Mudo nan manjadi Imam, sakalian manjadi Katik.........

Malin Mudo tasengeang sambie maucapkan Insya Allah......... Disalaminyo surang-surang urang kampuang, sajak dari Nyiak Wali sampai ka Si Kutar.