Malam sabana kalam pitok. Hujan tidak, anginpun tido, bulan nan indak ado pulo. Hanyo bintang dilangik nan manarawang. Malam nantun patang Kamih malam Jumahaik. Kalau manuruik carito urang kampuang, malam nan bak nangko sagalo ruah haluih batabangan manguliliangi kampuang.

    Sakali-sakali tadanga suaro anjiang maluluang panjang........ managakkan bulu ramang. Tapi urang nan baduo tu nampak tanang-tanang sajo bakalam-kalam bantuak itu. Nan surang duduak baselo ditanah, nan surang lai duduak diateh batu nan agak katinggian. Kaduonyo baadok-adok an cando sadang barundiang.

    Urang nan duduak di tanah masih anak mudo matah. Namonyo si Jufri. Si Puri kalau diimbau sahari-hari di kampuangnyo. Nan diateh batu alah tuo urangnyo, biaso diimbau urang Tuak Itam. Diadok an urang nan baduo tu ado sikue ayam hitam, sikue ayam putiah nan bakabek kaduo kakinyo. Ado pulo piriang putiah laweh nan barisi bareh sacupak. Diateh barehtu tatagak pinjaik tujuah buah manguliliangi kain ganiah nan sakabuang. Diateh kain ganiah ado pulo pisau sirauik tajam, sabilah.
“Alah....?”, tanyo Tuak Itam. Suaronyo tadanga garuak, tapi kareh tadanganyo.
“Alah angku....”, jawek si Puri.

    Kaduonyo haniang pulo. Tuak Itam maambiak angok tigo kali, sudahtu tadanga awanyo mambacokan manto sakulimaik. Suaronyo tadanga kareh mamacah malam nan nanek nantun:

hak pancur bagindo alang,
mulo asa angkau datang,
ya Musa kala Musa.....
ya Musa kala Musa.....
ya Musa.......
hak jadda.....
takiak nan kayu, kayu bana
takiak nan batu batu bana
Antah bahaso apo tu. Mungkin bahaso kuno Minang saisuak, nan lah jarang tadanga kini.

“Kini basijongkong.....”, Tuak Itam manyuruah si Puri. Nan si Puri patuah sambie satangah marangkak jo lutuiknyo. Basijongkong.
“Onyokkan lihie........”’ parentah Tuak Itam pulo. Si Puri nan hanyo basarawa pendek, indak babaju tu mamanjangkan lihienyo.

    Tuak Itam mancakau ayam nan hitam. Didabiahnyo ayamtu jo pisau sirauik. Ditonggeangkannyo ayam badabiah tu kadakek lihie si Puri sahinggo badan si Puri bagulimang jo darah ayam........ sampai ayam tu mati. Sudah tu ayam nan putiah pulo lai. Darah samakin bagalepak ka badan si Puri, taraso Angek mailie dari kuduak jo lihienyo sampai ka pungguang jo dadonyo bagai.

“Alah....... kini batarak waang di pincuran manau tu........”, Tuak Itam mamarentah pulo sambie manunjuak ka pincuran nan agak jauah dari sinan. Nan si Puri patuah bajalan lambek-lambek dalam kalam, ka Pincuran Manau tu. Aienyo mailie dareh, sabana dingin ditangah malam nantun.

    Pincuran Manau tu pincuran nan dibuek dari batang anau. Aie nyo mancoroh sagadang batang anau tu pulo. Si Puri duduak baselo di batu layah dibawah pincuran tu........ Hiiiii, sabana dingin manggaretek. Siang hari sajo urang abih manggigie kadinginan kalau mandi di Pincuran Manau tu. Udaro Bukik barisan lah tanamo sangaik sabana dingin. Lai sapaisok an rokok lamonyo si Puri batarak disinan, sampai Tuak Itam tibo manyuruah nyo kalua.

    Kaki jo tangan si Puri lah lali indak baraso. Garamannyo dipatauikkannyo manahan dingin. Katiko digarikkannyo kaki jo tangannyo taraso kaku. Tagagik-gagik awanyo bajalan manuruikkan Tuak Itam dari balakang. Tibo-tibo inyo takajuik mandanga Tuak Itam basorak kareh:
“DARRRAAMMMM SIMANANGKITANGGGG......HEIIIITTTT!!!!!!!!!!”.

    Si Puri mambaliakkan badan capek. Tangannyo tahayun kaduonyo kamuko sambie duduak balutuik madok ka pincuran Manau. Nampak awanyo manahan angok kareh-kareh. Aie pincuran Manau mailie samakin lamo samakin lambek,...... sampai kudian baranti.......... Bantuak basisuruik aie tu ka hulunyo.........

“LAPPEEEHHH...... TAAAAHHHH!!!”, tuak Itam basorak pulo. Si Puri manurunkan kaduo tangannyo. Tuak Itam tasengeang mancaliak ka si Puri. Aie pincuran Manau mailie dareh baliak bantuak biaso. Sudah tu kaduo urang tu mandaki arah kapuncak Bukik Barico, katampaik biaso Tuak Itam tingga. Disinan ado dangau ketek baatok jo daun pua kariang. Dindiangnyo balapisi jo ilalang nan alah kariang pulo. Taraso agak angek dalam dangau tu dek si Puri. Lampu dama majok-ijok manarangi.

    Di lantai nampak nasi angek nan baru ditanak, jo duo ikue ayam nan alah bapanggang. Salamo si Puri batarak dibawah pincuran manau, ruponyo Tuak Itam lah mananak nasi jo mamanggang ayam tu.
“Pakai baju!!!............  Dingin ang????.”, Tuak Itam manyuruah si Puri mamakai baju, sambie batanyo.
“Indak.....” jawek si Puri pulo.
“Makan kito...... tu ayam nan putiah makan di ang, ko nan hitam di den.......”, kaduonyo makan sampai habih nasi nan batanak tu. Dingin alah taraso bakurang taraso di badan si Purin.

“Kini cubo kana langkah partamo nan den bari katiko waang baru tibo daulu......”.
Si Puri haniang sakijok, sudah tu inyo manjawek lanca:
“Nan diurang usah diambiak, nan diawak usah barikan”.
“Di bulan nan katigo?”
“Nan diawak untuak urang, nan diurang untuak awak”.
“Bulan kalimo”.
“Tak ado nan diawak, tak ado nan diurang. Nan ado hanyo di Nan Qadim”
“Bulan ka salapan.”
“Indak ado awak, indak ado urang.... nan ado hanyo Nan Qadim”.
“.........BAPUTUIHHHH........!!!!!!!!!”,

    Kaki Tuak Itam manyemba kancang kadado si Puri. Badan si Puri malayang kateh, hinggok baliak sambie tagak maangga simpie. Sakali lai sacapek limbubu tumik Tuak Itam manyemba kadaguaknyo. Si Puri marunduak jo gelek sambie tangannyo mancakau kaki Tuak Itam tu..... Tapi kaki Tuak Itam bak cando ula, mangaleong lapeh dari tangan si Puri. Kini Tuak Itam tagak sambie tangan suoknyo nan kini manyemba capek......... Kaduonyo basilek bantuak ka mambunuah, sampai lah mandakek ukatu subuah.......... Tuak Itam basorak pulo:
“TAHANNN....!!!!!!”.
Si Puri malompek suruik, sambie tagak luruih. Sudahtu inyo cando basujuik. Kaduo tangannyo basusun rapek dikapalo. Dionyokkannyo salam nan disambuik pulo dek Tuak Itam sambie galak sengeang.

“Padek.....”, Tuak Itam mamuji. Si Puri manakue.
“Kok kaji ang alah bakatam, kok ilemu alah bapati, tunyo nan lain tasarah dek waang, kama ka ang bao kasadonyo.....”. Si Puri haniang sambie madok ka Tuak Itam. Hanyo jo mato awanyo manyampaikan tarimo kasi.

    Kajadian tu alah ampiang ampek puluah tahun nan lapeh. Si Puri kini mangana kasado alahnyo tu sambie mangelai di sofa lambuik. Balain bana jo katiko awanyo manuntuik ilemu jo Tuak Itam di Bukik Barico saisuak. Tampaik nan kini ko, kantue usao si Puri. Kantue parusahaan gadang impor ekspor. Kasado alahnyo ko hasie karajo si Puri salamo ampiang ampek puluah tahun. Si Puri alah manjadi Pengusaha Besar di Jakarta ko.

    Di adok annyo kini ado Hadji Siraj nan jo takzim mandangakan carito pak Jufri tu. Sakali-sakali Hadji tu manggeleang-geleang, sakali-sakali maangguak-angguak. Kadang-kadang awanyo batanyo nak mampajaleh carito pak Jufri ko.

    Lah ampie pulo satahun lamonyo Hadji Siraj ko acok datang kakantue pak Jufri. Pak Jufri nan maajak, karano kini awanyo nak mandalami bana baliak tantang ajaran agamo. Daulu sangkek ketek inyo iyo lai baraja agamo, tapo sasudah baguru ka Tuak Itam lah lupo sagalo nyo tu.

    baa kaindak: katiko itu Puri baru tamaik SMA di Padang, tapi indak luluih test untuak malanjuikkan ka Universitas. Jo hati ibo awanyo pulang kakampuang ka inyiaknyo. Iyo dikampuang nan ado hanyo inyiaknyo nan alah tuo pulo, sadangkan Amak jo apaknyo di Padang. apak si Puri bakarajo jadi urang bapangkaik pulo di kantue Gubernur.

    Salamo dikampuang tu lah, si Puri tingga jo inyiaknyo. Bakawan jo anak-anak kampuang nan saumue jo inyo. Kalau hari pakan, awanyo jo kawan-kawannyo pai kapakan mangawani kawan-kawannyo tu manggaleh manjua hasil paraknyo. Ado nan manjua lado, ado nan manjua taranak ayam atau kambiang bagai.

    Nan manjadi paratian si Puri pado babarapo kali hari pakan, ado urang gaek kuruih nan manjua santo (timbakau). Mato urangtu tajam mancaliak ka sia nan mambali timbakaunyo. Indak banyak carito urang tu nampaknyo. Bantuak indak ramah jo urang kampuang, tapi banyak pulo nan barabuik mambali santo nyo. Santo Tuak Itam lah tanamo sajak daulu, karano sabana lamak diisok jo daun anau.

“Itu Tuak Itam.........”, kecek si Nawin nan manggaleh patai ka si Puri. Si Puri mamparatikan urang gaek kuruih tu. Bantuak lah tingga kulik sajo nan mambaluik tulang nyo. Abuaknyo panjang, jarang, alah putiah pulo, kapalo nyo bakabek jo deta sabang-sabang dari kain Jao. Bajunyo hitam, guntiang cino. Sarawanyo galembong hitam pulo. Dipinggangnyo tabalik kain saruang nan alah agak puda rononyo.

“Sia baliau tu?”, si Puri babisiak batanyo ka si Nawin.
“Antahlah...... indak banyak nan tau. Kabanyo urang gaektu tingga surang di Bukik Barico ba ladang santo.
“Bukik Barico.......?”
Si Nawin maangguak. Nampak agak takuik inyo manyabuik Bukik Barico tu. Baa kaindak? Bukik Barico tanamo tampaik sarang Urang Bunian jo Hantu Aru-Aru. Indak ado urang nan barani mandaki ka bukik tu.

“Indak ado dunsanaknyo bagai?.
“Indak...... Kabanyo saisuak katiko jaman Bulando, awanyo kamari jadi pangiriang amtenar Bulando. Tapi antah apo sababnyo, katiko Bulando tu babaliak ka Bukik Tenggi, awanyo mailang. Kudian baru tau urang baraso inyo lari ka Bukik Barico.......”.
Si Puri maangguak-angguak mandanga kan. Bantuak carito komik silek nan acok dibaco nyo salamo ko.

    Makonyo sasudah pakan lah muloi langang, diiriangkannyo dari jauah Tuak Itam tu. Dinantikannyo urang gaektu babalanjo mambali bareh, lauak asin, babagai macam bumbu,.... sampai panuah katidiangnyo. Katidiang gadang nan panuahtu dipikuenyo surang. Badannyo nan kuruihtu, malenggang bantuak indak taraso barek baban tu dek inyo. Batambah tacangang si Puri nan mancaliak. Makonyo diiriangkannyo urang tu taruih.

    Katiko lah tibo ditapi kampuang, urang gaektu mailang. Si Puri binguang dek rimbo lah muloi agak labek. Dicaliaknyo kabalakang, jalan lah agak jauah pulo nan tatampuah. Hari lah badarok sanjo.......... Mulo bakato hati si Puri.

“Aaaaa nan waang cari?. Baa mangko ang turuikkan aden sajak tadi?”
S Purin takajuik. Dimukonyo kini tagak Tuak Itam sambie mamikue katidiang gadang nan barisi pambaliannyo tadi. Suaronyo agak garuak, tapi kareh tadanga.
“Maaf..... indak ado mukasuik Buruak dari ambo......”.
Si Puri agak tagagok manjawek, sambie manyusun kasapuluah jarinyo. Tuak Itam mamparatikan si Puri sajak dari kapalo sampai ka kaki. Babaliak pulo baliak dari kaki sampai ka kapalo.
“Jadi aaa mungkasuik ang sabananyo?”
“Hanyo...... ambo nak pai jo angku”.
“Ka manga ang pai jo den.....?”
“Indak manga-manga........ kok lai buliah nak manuntuik bake angku....... sambie..... sambie kok dapek manolong-nolong angku.......”.

    Tuak Itam tagalak sengeang mandanga. Diparatikannyo baliak si Puri dari ateh kabawah. Lamo ditaneknyo mato si Puri.

“Ang anak sikola..... apo pulo nan ka ang tuntuik ka den?”.
Si Puri tahaniang. Tuak Itam malatakkan katidiang gadang nan panuah tu. Babunyi balambin katiko tibo di tanah.
“Lai sabana nak manolong aden, awaang?”
“Iyo ‘ngku....... sabana nyo........”.
“Kok iyo cubo lah tolong den mambao baban den ko”, keceknyo sambie manunjuk katidiang nan dilatakkannyo tadi.

    Si Puri maangkek katidiangtu ka dipikue nyo. Tapi...... indak manggarik bagai katidiang tu doh. Dicubonyo sakali lai. Jan lai ka taangkek, manggarik sen indak....... Kasudahannyo katidiangtu diambiaknyo baliak dek Tuak Itam jo tangan kidanyo. Dipikuenyo, sambie tangan suoknyo mamacik tangan si Puri.
“Piciangkan mato ang......... kok iyo kapai ang jo den”.
Tuak Itam manyuruah si Puri mamiciangkan mato nyo. Sudahtu raso maawang badan si Puri. Indak lamo taraso dek si Puri.

“Ha, bukaklah mato ang tu baliak......”
Si Puri mambukak matonyo. Tacangang inyo mancaliak tampaik nan alun mancubo didatanginyo tu. Rimbo gadang, jo parak timbakau nan cukuik laweh. Ditangah parak timbakau tu ado dangau ketek baatok jo daun pua, badindiang jo ilalang kariang.

    Sajak itulah si Puri tingga disinan jo Tuak Itam sambie manolong urang gaektu maabehkan parak santo nyo. Jago pagi, mandi di Pincuran Manau. Sudah mandi makan sangenek jo minun kopi. Sudah tu mangamehi ladang santo lai. Sasudah bakarajo diladang tu....... saketek-saketek bamulo ilemunyo diturunkannyo dek Tuak Itam ka si Puri. Kadang-kadang sampai tangah malam. Kadang-kadang sampai lah mandakek subuah........ Sajak dari ilemu Silek sampai Pidareh, lapeh ka tinggam jo gulambek, sampai pulo ka sijundai jo pakasiah........., bakawan jo urang aluih, lah disalin abih dek si Puri.

    Salapan bulan lamonyo si Puri baguru disinan jo Tuak Itam. Salapan bulan pulo lamonyo urang gego di kampuang mangecekkan si Puri hilang dilarikan Urang Bunian. Apak jo amaknyo lah pulang-baliak dari Padang ka kampuang mambao polisi bagai........ Si Puri hilang dilarikan Urang Bunian........... Basudahi jo ta’alia lai, karano si Puri lah disangko mati dimakan Urang Bunian di Bukik Barico.......

    Talipon ganggam pak Jufri babunyi. Lagunyo lagu saluang. Iko tando nan manalipon dari rumah ko mah.
“Papa belum pulang.....?”
“Ya sebentar lagi, papa masih di kantor”.
“Masih menunggu orang Jerman itu?”
“Oh tidak...... semua sudah selesai, tadi dia sudah datang,... papa Cuma ingin istirahat sebentar........ menunggu Hadji Siraj yang mau datang.......”.
“Yaaa,..... jangan terlalu cape lho pa.......”.
Suaro rang rumahnyo sabana mananangkan hati pak Jufri.

    Sabagai pengusaha gadang nan berhasil di Jakarta, kok harato lah balabiah dari nan ka paralu. Anak-anaknyo lah gadang-gadang pulo, lah ado nan manjadi dotor, ado nan bakarajo di kedutaan dilua nagari, sahinggo dirumah tingga baduo jo amai paja sajo lai.

“Pak, ....pak Hadji Siraj sudah ada didepan........”.
Dari aiphon dimeja nyo sekretarisnyo maagiah tahu.
“Hadji Siraj?”
“Iya  pak....”.
Pak Jufri tagak mambukakan pintu. Saurang laki-laki, labiah tuo saketek dari anaknyo nan partamo, kini tagak dimuko pintu tu.
“Silakan masuk pak Hadji.....”.
Nampaknyo urang tu sangaik dihormati bana dek pak Jufri. Ka urang tu lah salamo ko pak Jufri pernah bacarito panjang parjalanan hiduiknyo. Ka urang tu lah satu-satunyo nan tahu baa bana daulu inyo manuntuik ilemu di Bukik Barico jo Tuak Itam. Ka urang tu pulo pak Jufri mamuloi baliak baraja kaji jo ugamo.

“Seringkah ilmu bapak itu diterapkan dalam kehidupan bapak selama ini? Dalam berbisnis, misalnya......?”, itu tanyo nan parnah ditanyokan Hadji Siraj ka pak Jufri.
“Tidak..... tidak pernah sekalipun. Hanya...... sekali-sekali saya pergi ke hutan gunung Salak untuk sekedar mengasahnya...... biar tidak lupa saja.....he, he”.
“Jadi......?”
“Yaaaa,...... dikehidupan sekarang tak ada relevansinya ilmu itu sama sekali. Makanya saya ingin ke Mekah bersama istri saya, dan ditemani anda......... Selama ini saya sudah seakan melupakan ajaran-ajaran agama........ Sudah waktunya saya membuang ilmu itu.......”.

    Mato pak Jufri nampak baganang. Pandangannyo jauah. Tuak Itam iyo sabana indak mancubo manganakan tantang ugamo. Hiduiknyo salamo jo Tuak Itam sabana makan masak matah ditangah rimbo Bukik Barico.

“Alhamdulillah...... Subhanallah......... Semua dokumen keberangkatan bapak akan saya siapkan. Bapak dan ibu tinggal berangkat, pak...... Anak-anak bapak apa tidak ada yang berangkat sekalian?”.
“Mereka..... mereka........ sudah punya hak dan kemampuan sendiri untuk itu..... Saya hanya ingin pak Hadji yang menemani saya”.
“Oh.......”
Hadji nan masih mudo tu tahaniang.

    Talipon pak Jufri babunyi pulo baliak. Ruponyo dari anaknyo nan lah manjadi dokter tu.
“Papa lagi sibuk?”
“Tidak..... tidak.... ada apa?”
“ Ini pa....... ada kabar baik........... kami anak dan menantu papa punya niat nih......”
Suaro diujuang talipon tu tadanga riang.
“Niat apaan?”
“Kalau papa berkenan, masa hadji yang akan datang ini kita ke Mekah sama-sama...... Naik Hadji pa,..... ziarah kita sama-sama mama juga......ya pa”

    Pak Jufri tamanuang. Aie matonyo kini manggalanggang.
“Alhamdulillah nak,........ sebenarnya papa sudah mempersiapkannya untuk papa dan mama kalian......... Kalau begitu kita bisa berangkat sama-sama saja.......”
“Oh.... kenapa papa gak pernah bilang?”.
“He, he..... yang namanya ibadah tidak perlu diumumkan bukan?”.
“Allahu Akbar....... kalau begitu ya,....... kita berangka sama-sama ya, pa.......”.

    Hadji Siraj nan sajak tadi sato mandanga talipon pak Jufri jo anaknyo tu, maangkek kaduo tangannyo sambie mangucap “Subhanallah......”. Sudahtu disalaminyo arek-arek tangan Pak Jufri.

“Allah Maha Besar pak Jufri.......”
Pak Jufri maangguak-angguak sambie galak jo sanang hati.
“Kalau begitu..... saya juga akan berangkat sendiri.....”
“Hah?....... pak Hadji tidak jadi menemani saya?”
“Bukan begitu pak Jufri. Saya akan selalu mendampingi bapak sampai kembali ketanah air. Tapi....... bukankah tadi bapak juga menyampaikan bahwa semua orang punya hak dan kemampuan untuk melakukan kewajiban?”.
“Maksud..... maksud pak Siraj.....?”
“Bukankah...... saya juga punya hak dan kemampuan itu sebagai sebuah kewajiban........ dan ibadah saya.......?. Kita akan berangkat sama-sama, pak Jufri.....”

    Dipaguiknyo Hadji Siraj nan mudo matah tu dek pak Jufri. 
“Saya yang sudah tua ini banyak belajar dari pak hadji yang muda belia......”
“...... saya yang sungguh banyak belajar dari pak Jufri........ Pengalaman bapak amat luar biasa........ Bapak orang berilmu lahir-bathin........ Bapak telah melihat mana yang dijalan Allah, mana yang bukan............ dan sekarang bapak sudah menjadi orang sukses.......... Orang yang berhasil.........Bapak lah guru saya yang sesungguhnya........”.
Hadji Siraj nan masih mudo tu mancium tangan pak Jufri. Bulan haji nan katibo urang tu samo-samo barangkek ka Makah. Pak Jufri nan daulu diimbaukan si Puri, sabana baniaik ka mambuang ilemu Tuak Itam tu di Makah nantik.

ALLAHUMMA LABAIKH..........