Alhamdulillah alah terlaksana acara Gathering cimbuak nan ka-4 di palanta Darek Pasa Minggu pado tanggal 17 April 2011.Acara gathering diadokan untuak mampaarek silaturahmi antaro sesama member cimbuak nan biaso hanyo bachatting di palanta cimbuak melalui dunia maya. Acara ko biaso nyo diadokan tiok tahun. Nan mano pado tahun sabalunnyo diadokan di Kebun Binatang Ragunan.

Karano memang acara ko memang dari awak untuak awak sadonyo,  konsumsi nyo pun dari berbagai member pulo. Goreang jariang, goreng taruang jo maco bapatai, sayua gulai alah dimasak malam sabalunnyo di rumah uni rina_bkt nan dibantu Yulia, Reni jo Pera.  Salain itu ado pulo anyang dagiang dari Da Topiq Simabua. Kok buah nyo lah nyo sadiokan pulo dek Deswita jo Rakhi dan Pak Retman jo uni Elsi. Minum kopinyo kue dari Banduang jo Bakpia dari Mak Jam. Langkok lah makanan jadinyo walau menu sederhana sajo.

 
Indak pulo ketinggalan  jo lauak baka nan lauaknyo  hasil mamapeh Pak CF Group, ado Pak Erwin, Mak Bandaro, jo Pak Basrizal Tanjung dimano baliau ko adolah suami Ibu Novia nan baru datang dari New York

Sasuai rencana acara  dimulai sajak pukua 10 pagi. Namun efektifnyo acara baru bisa dimulai sekitar jam 11 siang.  Banyak juo member nan tibo ruponyo, tamasuak uda Webmaster jo keluarga.  Salain itu ado pulo uda Topiq Simabua, Pak Sutan Mudo,Uda Maison Yossi, Pak Jim, Amel, Leni,  Uni Yet, Taufik Cassanova, Raul Tanjung, Uda Asadad sakeluarga, jo member member lainnyo.

Acara dibuka dek Mak Bandaro Labiah dimano baliau sabagai MC diacara ko. Nyanyian uni Silvy mulai memeriahkan suasana acara. Sambia  manunggu ikan baka dimasak. Ado nan maota, ado nan sibuk di dapua, ado nan sadang mambungkuih kado, ado nan mangipeh ikan baka. Sarupo itu lah suasana manjalang makan siang.

Hari lah manunjukkan sekitar jam 12 siang. Sasudah sumbayang bajamaah, tibo wakatu makan basamo. Ikan baka lah siap disantap, samba di dapua lah siap pulo dihidangkan, mako bakumpua lah member sadonyo di lantai ateh palanta darek untuak makan siang basamo. Nampaknyo jariang nan favorit dek member nan tibo. Lahap  bantuak nyo para member nan makan siang wakatu itu.

Kok paruik yo lah kanyang, member nan hadir bakodak basamo di halaman dakek palanta darek.

Sasudah tu barulah acara nan dinanti dek member nan hadir di mulai, nan ndak lain ado lah bamain KIM. Ruponyo banyak member nan lun tau caro bamain KIM ko. Walau lah ditarangkan dek Mak Bandaro Labiah caronyo, tapi ado juo nan salah. Ado nan maetong angkonyo kabawah, ado pulo nan sumbarang nyo sambuang se angkonyo. Lah jadi bahan galak galak sajo jadinyo. Suasana main KIM batambah seru, dek sadonyo penasaran jo angko angko nan ado di karateh KIM nyo.

Lumayan juo banyak hadiah KIM nyo, mulai dari dispenser, flasdisk, tampek CD, indomie, memory card , tampek pambuek teh sampai ka deterjen ado bagai ruponyo.  Semangat bana nampaknyo member nan tibo bamain KIM ko. Ado nan tagak di muko bia nampak jaleh papan KIM nyo, ado nan duduak di kursi, ado nan serius bana pulo mancaliak angko di karateh KIM nyo. Malah ado bagai nan banyak sangaik karateh KIM nyo.  Acara KIM ko, baru pertamo kali diadokan dek cimbuak. Mungkin dek itu pulo member sadonyo antusias ikuik bamain.

Main KIM ko bantuak nyo memang mancandu bantuak nyo dek member nan tibo, tapi indak malupokan nan 5 wakatu. Habih ashar bamain KIM basambuang baliak sampai manjalang maghrib. Dek karano hadiah utama nyo alun kalua juo,  bamain KIM nyo dipacapek lagu nyo . Akhir nyo kalua juo hadiah utamo nan di dapek dek uni rina_bkt.  Manjalang magrib acara Kim salasai dan ditutuik dek panitia.

Ado nan dapek hadiah, ado pulo nan indak dapek. Tapi bukan itu inti dari acara gathering ko, nan tapantiang ado lah silaturahmi kito member cimbuak tajalin indah. Di cimbuak kito batamu, di cimbuak pulo kito badunsanak. Cimbuak adolah tampek kito basamo. Babeda itu biaso, tapi jan sampai perbedaan mambuek kito basalisiah hinggo basangketo. Kok nyampang ado silang sangketo elok lah kito salasaikan jo caro kekeluargaan. Kami dari panitia acara maucapkan tarimo kasih ateh partisipasi sadonyo. Dari awak , oleh awak untuak kampuang paralu tetap kito jago.

Mudah mudahan di acara gathering selanjutnyo bisa tambah mampa-arek silaturahmi kito sadonyo